واحد من الناس

افهموا بقى يا بهايم

March 17, 2007

اى ..افهموا بقى يا بهايم, اخر جملة قالها اللى كان واقف جانبى فى المظاهرقبل مايقع غرقان فى دمه على الارض.
اخدت مكان زميلى اللى وقع ووقفت قدام عسكرى الرعب المركزى اللى على الجبهة التانية على بعد 10 سم منى .. ملامح العسكرى تشبهنا بس كلها غباوة وقسوة .
رفعت اليافطة اللى عليها دم زميلى وصرخت بالكلام اللى عليها..
يسقط يسقط حسنى مبارك.. يسقط الفساد
"اضرب" .. صوت الظابط
رفع العسكرى عصايته ونزل بيها على ..
طااااااااااااااااخ..
اى ..انت بتضربنى ليه .. انت عارف احنا بنقول ايه ولا عاوزين ايه ؟
طااااااااااااااخ..
طب انت عارف احنا مين؟
طااااااااااااخ..
احنا اخواتك .. احنا منك وانت منا
طااااااااااخ..
هما اللى مش منا
طااااااااخ..
انا وانت اللى مش لاقين شغل ولا عيش ولا دوا
طااااااخ..
هما اللى بيسرقوا فلوسى وفلوسك ويجوعونا
طاااااخ..
انا وانت اللى بيذلونا
طااااخ..
هما اللى جابو لامى وامك الكبد والسرطان وهما اللى غلوا الدواء بعد ما سممونا
طاااخ..
هما السريا وكلاب السريا واحنا عبيد الوسية
طااخ..
كام مرة شتموك بابوك وامك زى
طاخ..
ودلادك شبه ولادى ولا شبه ولادهم ؟
طاخ.
جزمتهم معلمة على ضهرى وضهر ابويا وضهرك وضهر ابوك
طاخ
خت بالى ان ضرباته بدات تخف وان عنيه مدمعة وان ملامحة رجعت تانى وبقت شبه ملامحنا
بس دى اوامر يا بيه
اوامر انك تضرب اخوك واختك لما يقولو اننا جعانيين ومنهوبين ؟
اضرب يا عسكرى .. صرخ الظابط لما شافه بيتكلم معايا
مش قادر يا فندم..
طااااخ.. المرة دى الضربة جت على دماغ العسكرى نفسه من زميله الى واقف جنبه.
وقع على الارض جنبى ..دمه ساح على دمى شبكت ايدى فى ايده.
واخر حاجة سمعتها .. يسقط يسقط حسنى مبارك
طاااخ..
انت بضربنى ليه…..
.
.
.

افهموا بقى يا بهايم,,

توالى سقوط المتظاهرين والعساكر اللى بدأوا يفهموا على الارض بنفس السيناريو اللى فات.
.
.
.
.
.
.
بعد 3 ساعات ..
الميدان فااضى ..اللهم الا من جثث ناس عادية مشبكة ايدها فى ايد عساكر فى وسط بركة دم.
واقف برجليه على الجثث دى الظابط اياه ..
الو الو عمليات ..تمام يا باشا ..كل شئ تحت السيطرة وتحت رجلينا ..
تأمر معاليك يا باشا.

Posted in حاجات تخصنا |

8 Comments »

The URI to TrackBack this entry is: http://1ofthepeople.blogsome.com/2007/03/17/p28/trackback/

1. أفهم من الكلام انها مصر اللى حذفت رقمك ؟؟؟؟

   لأ هو اسمك متحذفش لو انا فهمت صح الاسم موجود فى السجل المدنى يثبت على اننا كلنا مصريين
   بس حتسمع نبرة حزن مختفيه فى كلمة انا مصرى

   Comment by توهة — March 17, 2007 @ 1:44 am

2. طارق
   ايه البوست الجميل ده انتى فعلا حكيت شعور العساكر كويس اوى انا زيك شايف العساكر ديه مظلومة هما اتعودوا عاى انهم يضربوا معودهمش على حاجة تانية لان النظام ميهموش غير انه يضرب الشعب ويحمى نفسه
   احساسك جميل اوى

   Comment by مصر هى امى — March 17, 2007 @ 7:09 am

3. دي اللي اسمها ثورة العساكر

   Comment by fatma — March 17, 2007 @ 10:08 am

4. اضهار فى لبس حصل
   كان ظاهرلى البوست بتاع اليكى تحت البوست ده كأنه تبعه فكتبت التعليق على اساس الاتنين
   كان عامل كده زى بوست سريالى
   بس اخترعتله تفسير

   يلا نأسف للبس

   Comment by توهة — March 18, 2007 @ 2:08 am

5. محمد.. المشكلة مع العساكر دى انهم نادر اوى لما بيفهموا ..خصوصا انهم مفهمنهم ان احنا اعداء الوطن.

   فاطمة..عساكر ايه اللى تثور ..دة احنا اللى اسمنا مدنين مش قادرين نعملها .. البداية من عندنا مش من عندهم.

   توهة.. ولايهمك يا باشا

   Comment by واحد من الناس — March 18, 2007 @ 1:52 pm

6. اسلوبك اكثر من رائع

   انت اضربت علشان فاهم

   هو اضرب علشان فهم

   ربنا ينتقم منهم

   Comment by ahmEd_H — March 18, 2007 @ 2:33 pm

7. كل بوست ليك بيبقى أروع من اللي قبله
   كلهم بيجمعهم حاجة جميلة قوي عاجباني فيك
   إنك مرهف الحس أو بتعبير أخر رومانسي حالم
   واحد لسه بيعرفك

   Comment by phenomena_2 — March 18, 2007 @ 11:53 pm

8. ahmEd_H
   الف شكر يا جميل … كان نفسى اتعرف عليك كويس .. فرصة تانية ان شاء الله
   على فكرة دى قصة بتخيلها مش حصلت بجد ..انا اجبن من انى اقف فى مظاهرة ..حالياً

   phenomena_2
   ربنا يكرمك يا باشا

   Comment by واحد من الناس — March 19, 2007 @ 10:29 am

RSS feed for comments on this post.

Leave a comment

Line and paragraph breaks automatic, e-mail address never displayed, HTML allowed: <a href="" title=""> <abbr title=""> <acronym title=""> <b> <blockquote cite=""> <code> <em> <i> <strike> <strong>